أخبار عاجلة
الرئيسية » فيسبوكيات » محمد كا: ما بيضحك لرغيف السخن

محمد كا: ما بيضحك لرغيف السخن

يا سيدي معو حق، رح قلك شي.. رغيف الخبز صاير إرهابي، هيك بيطلع من الفرن بشرتو مجعلكة وحاطط العقدة، كل خبراء “البوتكس” ما فينن يفردولو عقدتو، وكل خبراء “الفيلر” رح يفشلو بتعباية تجاعيدو.. رغيف الخبز بيتحداك إنك تقدر تخليه يضحك، هيك بيطلع مطموز وقالب خلقتو، بتقول لحالك بجرب بمسكو، مسكين بيفرط بين إديك، بتقطعلك شقفة بدك تمسك فيها اللقمة، بتصير اللقمة لقمتين “بتقول انقسام خلوي”.. بتحك راسك بتفكر بزينغو ورينغو، بتسأل رينغو اللي بقلبك شو مشان الذكاء؟… بينط زينغو “فتّة” “ما في غير الفتة” جيب حليب جيب صحن، جيب سكر، حط خبز من الفرن “تازة” بالصحن وكت عليه الحليب وعلى قولة فتافيت “نخلط المزيج” مزيج “خبز عبستي” بتتفاجأ إنك ما عملت فتّة، وإنما عملت “فتنة” صارت الفتة مرهم “سيريلاك” ولحق على محاكم رافعتها عليك شركة نستلة.. والفتنة أشد من القتل..
تعال عالدواقة، جربت شي مرة تاكل خبزة يابسة بالشمس تحت الهوى، هيك طعمتو..
بس عمك رينغو قال حرام نعمة وقال في أماكن عم يحلمو بهيك رغيف وعم يدفعو حقو بلاوي! قلتلك فتنة ما بتصدقني..
صدقني لما تشتري الخبز بتكون عم تهدر النعمة ولما تضطر تشتريه بيكون الرغيف محاصرك..
أودعناكم



تنويه : ماينشر على صفحة فيسبوكيات تعبر عن رأي وفكر كاتبه ولاتعبر بالضرورة عن رأي الموقع