أخبار عاجلة
الرئيسية » فيسبوكيات » سرفيسيات

سرفيسيات

(سرفيسيات… )

– وقت تطلع بالسرفيس و يخبط راسك بالباب، فإذا كنتِ بنت رح تسمعي من كل الركاب: “الله الله خير صرلك شي؟” مع نظرة كلها شفقة، و ممكن يتحمس شي شب ويضرب الشوفير لأن الحق عليه ما اشترى سيرفيس ألو أكياس هوا مشان الصدمات… أما إذا كنت شب رح تسمع العالم عم تضحك وتقول: “العمى ضربو مانو شايف! يالله بيستاهل، الله أعلم وين كان عم يبصبص”.

– وقت بتسكر الباب بهدوء تبعاً لتعليمات الاعلان اللي عالباب وما بيتسكر، إذا كنتِ بنت “دخيل الله شو هالأنوثة ليك حتى عالباب مالها نفس تخبطو”… أما إذا كنت شب “ليك التشتوش ليك مالو حيل يسكر الباب، تفه.. على هيك جيل”.

– وقت بتسكر الباب بقوة و تطبشه طبش، إذا كنتِ بنت “يا حرام أكيد معصبة من شي شغلة الله يعينها”… أما إذا كنت شب “هشششش فهمنا أنك قبضاي خلعت الباب، خف علينا شوي ياأرنولد”.

 

– وقت بيوقفلك الشوفير وما بيكون في معو محلات أصلاً
إذا كنتِ بنت ما عليك إلا أنو تنظري نظرة وحدة لأي شب من اللي قاعدين بتلاقيه نط وقعد عالسفنجة اللي بعكس الشوفير… أما إذا كنت شب “دبر حالك عالدولاب وإذا ما عجبك روح مشي.. شه نحنا لما كنا بعمرك كنا نروح مشي عالحسكة”.

– وقت بيكون معك أغراض إذا كنتِ بنت في مين يطالعلك الأغراض وينزلهم ويحطهم بحضنو إذا بدك مع نظرة معناها: “يا حرام! وين أخواتها الشباب يجيبو الأغراض”… أما إذا كنت أنت أخوها الشب وجايب الأغراض رح تسمع “هوهوووووووو علينا.. تعال حطهم بحضننا كمان، كلو مشان ما تاخد تاكسي العمى عالبخل، الناس ماعاد استحت”.

 

– وقت بتطلع غنية بشعة والصوت قوي إذا بنت إلك الحق تقولي”وطي الصوت إذا بتريد أو غير المحطة” والعالم رح تشد معك وتقول بقلبها: “أكيد في إلها ذكرى حزينة بقلبها”… أما إذا شب رح يلتفت عليك الشوفير يطلع عليك من فوق لتحت، ويقوي الصوت زيادة ورح يقول: “ليك هالعالم ليك بدو يشترينا بالخمس ليرات تبعيتو”.

 

– وقت بدك تنزل وتقول للشوفير على مهلك وما يسمع بسبب الأغاني اللي حكينا عنها من شوي، إذا كنتِ بنت ما عليكي إلا أنو تفكري تفكير بالنزلة أو تهمسي همس بينك وبين حالك نزلني، واسمعي الشباب كلن بصوت واحد: “على مهلك على مهلك.. نزلها.. شو مانك سامع؟… عاليمين … نزلااااااا”، أما إذا كنت شب بدك تصرخ، يمكن ينزلك بعد 5 كيلو متر رح يطلع عليك الشوفير ويقلك: “شو لازم تنزل عباب البيت، تلحلح و أمشي شوي”.

– دفع الاجار هوا الشغلة الوحيدة اللي ما فيها تفرقة عنصرية كلو بدو يحط الخمس ليرات سابقاً، اللي صارت بعدين 15 ليرة، و أخر علمي انو وصلت للـ 25 ليرة…

 

Ashur Diab



تنويه : ماينشر على صفحة فيسبوكيات تعبر عن رأي وفكر كاتبه ولاتعبر بالضرورة عن رأي الموقع