أخبار عاجلة
الرئيسية » الشأن السوري » الدياسبورا السورية سفر برلك 2015 وصف دقيق لمعجزة انقاذ حياة 250 سوري مهاجر

الدياسبورا السورية سفر برلك 2015 وصف دقيق لمعجزة انقاذ حياة 250 سوري مهاجر

الرحلة ضلت 14 يوم وكان مخططلها 6 ,

اكتر من250 شخص كانو عالمركب ,

انطلقت من مرسين وكان وقتها نهاية عاصفة
======================
20-9-2014 الساعة 10 بالليل وصلنا الى ساحل متطرف في مرسين
الهوا قوي
العالم فوق بعضها
قالو طاقم الشختور (الشختور قارب صغير 8 متر) التركي اللي عشط مرسين انو بدنا ساعة منوصل للنش (اللنش قارب كبير طوله 35 متر) اللي بدو يبحر فينا بعرض وطول البحر المتوسط
طلعنا بالشختور وكانت اول نص ساعة ولا احلى موج عادي والعالم عم تحكي مع بعضا وهاد عم يدخن وهاد عم يحكي
بعدساعة من الانطلاق صار يعلى الموج لدرجة انو صرنا لعبة صغيرة طايفة بالبحر موجة بتاخدنا وموجة بتجيبنا
تاني ساعة صار يميل الشختور مع الموج لدرجة مخيفة والشط صار بعيد كيلو مترات وماعم تسمع غير صوت الاستفراغ والسعلة واللي عم يدعي واللي عم يبكي
تالت ساعة صارت العالم بقلب الشختور تميل مع الموج لانو ماعاد ممكن الثبات عارض الشختور والاغراض والشناتي عسطح الشختور عم يروحو يمين وشمال وهون في عالم مشوربة صارت تبكي متل الاطفال
رابع ساعة العالم فرط حبها وصار في اصوات مطالبة بالرجعة عتركيا وماعاد بدهن يهاجرو وطبعا هاد الشي مستحيل لانو دخول الحمام ما متل طلوعو وفي مافيا عالبر بتركيا قبضت مصاري عهالناس ولازم ما يرجعو وعندهن خيارين الموت او الوصول وبس
الساعة الخامسة الشب قبطان الشختور مضيع موقع قبطان اللنش وعم يحاول يدقله عالثريا مشان يعرف احداثياته ضمن هالوضع الكارثي وهون بيجي مدد رباني وبيعلق الثريا وبحكيه وبقله عالاحداثيات الجديدة اللي تغيرت ترتيباتها بسبب سوء البحر
شفنا ضو عم يطفي ويشتغل
طلع هو المركب يا ابو الشباب اللي بسموه اللوادئة اللنش وقربنا عليه وكان عم يرتفع حوالي عشر متار برات المي وينزل فيها عشر متار فتخيل يرعاك الله كيف بدك تنقل الشعب من المركب الصغير اللي ثابت مع المي لهاللنش اللي عم ينط
الوضع كان مأساوي والناس كلها معرضة للموت باي لحظة بسب الموج العالي وبسب خطر تحطم القاربين مع بعضها
حاولو البحارة اللي عاللنش يرمو حبال وكلها تنقطع بسبب التخبط العنيف بالبحر
بعد عدة محاولات ربطو عدة حبال مابين القاربين وبلشت لعبة شد الحبل
كل ما يقرب القارب الصغير عالقارب الكبير يصير اصدام عنيف وشي عم يتكسر وطبعا في حبال عم تنقطع وكل حبل سماكته شي 5 سم
المهم اجا مدد رباني جديد وهدي الموج شوي وهون هجمو اغلب الشباب الموجودين بالشختور متل قطعان البقر الله يعزكم وسمحولي عهالوصف لانه هو اقرب وصف
هجمو وماخلو دور لطفل او مرا او شيخ كبير
طبعا الهجوم كلله مشان ينطو من الشختور الصغير للنش الكبير واتبعو مبدأ اللي بيسبق بياكل فستق
المهم اجا مدد رباني جديد وهدي البحر اكتر وتمت عملية نقل الاطفال والنسوان المتبقين من الشختور للنش
طبعا اغلب الجناتي للشعب ضلت بالشختور وما بتتخيلو شوفيهن الجناتي , شي جوازات وشي ثوتيات وشي مفاتيح ومصاري ودهب ومدري شو وكلو ما انعرف وينه
مننتقل بالصورة للشعب اللي انتقل عاللنش واللي كله كان دايخ ومتسطح
الجيد باللنش انه ماكتير بيتخبط وبيتحرك مع الموج
تعرفنا تاني نهار عالبحارة بعد ما فقنا من الكابوس الليلي
طاقم البحارة كان متالف من 7 مع القبطان
سالناهن ايمت الانطلاق قالو في دفعة تانية من الناس لازم تجي ومافينا نترك المياه الاقليمية لمرسين قبل ما يوصلو
كان عاساس يوم وبتوصل الدفعة التانية
4 تيام لحتى بينت الدفعة التانية
انطلقت الرحلة بعون الله
اليوم الخامس صرنا عند قبرص
اليوم السادس , السابع , التامن لحتى قطعنا قبرص
بيجي القبطان باليوم التامن بقول ماعاد ضل اكل ومي كتير لازم نقنن
اليوم التاسع , العاشر خلص الاكل والمي ما ضل منها الا كم قنينة وكنا وقتها واصلين عند جزيرة اليونان مدري شو اسمها بس المهم انو قطعنا نص المسافة ما ين تركيا وايطاليا
اليوم ال11 اليوم 12 خلصت المي نهائيا والعالم صارت تاكل بقايا الخبز المعفن وبتشوف حلبات مصارعة عقنينة مي
اليوم ال13 الساعة 1 بالليل بوقف المركب باليل والقباطنة الفحولة بشرو العالم انو نحنا قطعنا اليونان ولكن للاسف ماضل معانا مازوط
نحنا بنص البحر بعيدين عن اقرب يابسة 400 ميل ومافي لا اكل ولا شرب ولا مازوط للمركب
زاد الوضع سوء انو الثريا ماكان فيه رصيد واللاسلكي خبصو فيه القباطنة ماعرفو يشغلوه
هون اجا مدد رباني وتعبا الثريا وصارو القباطنة يسالو مين معاه رقم الصليب الاحمر !
نعم تخيل يا اخي الطاقم تبع المركب عم يسال شو رقم الصليب الاحمر
هون بيجي واحد من الشباب معو رقم نوال المغربية الناشطة المعروفة والصليب الاحمر وخفر السواحل الايطالي
اتصلو بنوال وعطوها المعلومات والاحداثيات
نوال المغربية بعد الفضل لله كان الها فضل كبير بانقاذ ارواح هالناس لانها عملت شبكة اتصالات مع خفر السواحل المالطي والايطالي واليوناني والصليب الاحمر باغلب الدول المطلة عالبحر المتوسط
العالم بهالوقت طبعا نسيت شي اسمو ايطاليا وهجرة وصار بدها اي دولة تنقذهن
طلع فجر اليوم ال14 بمدد رباني ايضا وهو انه كانت للصدفة عدة بواخر تجارية قريبة من الاحداثيات وتوجهو فورا للانقاذ
6 بواخر تجارية عملاقة كانت حوالي اللنش بوقت قياسي للانقاذ
صار يزتو اكل ومي والعالم تنتفت عليها
رتبت البواخر مع بعضها عملية الانقاذ وتطوعت باخرة اوكرانية المنشأ فلبينية الطاقم تقريبا للانقاذ
تمت عملية الانقاذ بسلاسة ضمن اعلى معايير السلامة والامان والقباطنة طبعا مانن عم يعملو شي غير عم يضحكو ويترجو العالم انو ما يدلوهن عليهن لانو بروحو فيها
الباخرة كانت متوجهة لمالطا ولكن مشان ما تخجل هالناس توجهت لايطاليا
ضلينا يومين بهالباخرة التجارية لوصلنا للساحل الايطالي ضمن احسن معاملة
هي الرحلة باختصار

 

1