أخبار عاجلة
الرئيسية » فيسبوكيات » دينا بطحيش: ولك ولووو ولو شو مشتائة للشام

دينا بطحيش: ولك ولووو ولو شو مشتائة للشام

مشتائة لحاراتها المعفنة المعباية كياس شيبس وعقاب سكاير … مشتائة للشيخ محدين بعجئتو وصوات البياعين والبندورة المفعسة باﻻراضي
مشتائة انزل بالزنوبا ع مدرستي بالشعﻻن وارجع تمشاية ع سوء التنابل واشتري كمشة عوجا ونئرشها وانا راجعة ع ركن الدين
مشتائة اطلع ع جنينة النيربين واتئنزع فوء شي مقعد مكسور وائعد ادرس لمادة تاني يوم وارسب متل كل مرة
مشتائة اطلع ع قدسيا وعوف حالي وانا وائفة تحت الجسر ﻻستنا عمو ابو أيمن ….
مشتائة ساوي فنجان القهوة ع هاﻻسطوح وائعد انا وجارتي أم كنان ونشلي ع وﻻد الحارة واحد واحد
مشتائة لأبو كارو جارنا العوايني ، الي انا بعرفو عوايني وهو بيعرفني مع الثورة وكل واحد مدشر التاني بحالو
مشتائة لوﻻد هالحارة الي بئي كل واحد منهن بديرة والي ضل بهالبلد صار تحت تراباتها
مشتائة و روحي متمنية تمشي ليوم واحد بالشام .. يوم واحد والله مو طالبة كتير



تنويه : ماينشر على صفحة فيسبوكيات تعبر عن رأي وفكر كاتبه ولاتعبر بالضرورة عن رأي الموقع