أخبار عاجلة
الرئيسية » فيسبوكيات » عم بدعي لربي إنو مارك يسكرلي صفحتي ويخلصني

عم بدعي لربي إنو مارك يسكرلي صفحتي ويخلصني

هالبوست فشة خلق ومو ضروري يعجبكن
.
ثوار بيحرقو القلب

-بينحرق قلبي لما بتذكر ثورتنا اللي قامت بشعار واحد واحد واحد الشعب السوري واحد ولما بشوف هلأ كيف صار كل سوري لوحده ..

-بينحرق قلبي لما بشوف اهلنا بالمخيمات والشوارع والمثقفين عم بنظروا عليهن من قهاوي أمريكا وفرنسا ..

-بينحرق قلبي لما بشوف كيف اليساري صار طائفي وكيف اليميني صار يساري وشمالي وجنوبي ..

-بينحرق قلبي لما بشوف إنو المعارضة صارت مهنة والمعارضين موظفين برواتب ..

-بينحرق قلبي لما بشوف المسيحي عم يتملق للإخونجي وآلاخونجي كيف تملق للإيراني الشيعي ..

-بينحرق قلبي لما بشوف كيف بعض الثوار قاموا من أجل الحرية ضد الدكتاتور بشار وبنفس الوقت بمجدوا الدكتاتور صدام يا إما لأنو سني يا إما لأنو عربي يا إما لأنو حارب الإيرانيين وبينسوا أديش كان مجرم وكيماوي وأديش قتل عرب وأكراد ..

-بينحرق قلبي لما بشوف بعض الأكراد كيف بيكرهوا العرب وبحملوهن مصايب النظام وكأنو العرب ما عانوا من النظام ..

-بينحرق قلبي لما بشوف كيف بعض السنه بيتهجموا على الثوار الإسماعيليين والدروز وبحمولهن ذنب وجود شبيحة اسماعيليين ودروز وكأنو مافي شبيحه سنة وكأنو كل واحد مسؤول عن شبيحته ..

-بينحرق قلبي لما بشوف بعض الإسماعيليين والدروز كيف بحملوا السنه ذنب وجود داعش كونها سنية وبينسوا أديش شهداء سنه دفعوا أرواحهن من أجل حرية الجميع وأديش سنه عانوا من جرائم داعش وآديش في سنه واقفين ضد داعش ..

-بينحرق قلبي لما بشوف بعض البشر نسيوا بسرعة البرق إنو مصطفى طلاس كان أحد أعمدة النظام وكيف وقع أكتر من 50 ألف وثيقة إعدام وجنابهن نازلين تحية لصطيف ولإبنو فراس أبو صطيف …

-بينحرق قلبي لما بشوف هالثورجيه المتملقين كيف ما شاعرين بحالهن أديش تافهين وأديش عم بهينوا أرواح شهداء حماه ..

-بينحرق قلبي لما بشوف كيف الناس صارت مشان كلمة تخون وتكفر وتحلل قتل بعضها البعض ..

-بينحرق قلبي لما بشوف بعض البشر بتمشي متل الغنم ورا بعض الشيوخ السذج بإسم الدين ..

-بينحرق قلبي لما بشوف قرايبيني من لحمي ودمي كيف كفروني لأني لا أقبل السذاجة والغباء بإسم الدين ..

-بينحرق قلبي لما بشوف كيف موثق الثورة على أساس السيد آكاد الجبل بسبب معاداته إلي نسي يكتب كلمة عن إبن أخي الشهيد تحت التعذيب وكأنو إبن أخي لم يستشهد من أجل الوطن ..

-بينحرق قلبي لما بشوف لوين وصلنا بالحقد والكراهية ..

-بينحرق قلبي لما بشوف كيف كلنا شايفين بعضنا على مسلم ومسيحي وسني ودرزي واسماعيلي ونسينا إنو نحن قبل كل شي بشر ..

-بينحرق قلبي لما بشوف إنو 4 سنين من الثورة وهالكمية الهائلة من القتل والدمار ما قدرت توحدنا وتصحي ضميرنا .. وبعدها منحمل ذنب محنتنا للشرق والغرب وما منشوف حتى اخطاءنا …

-محروق قلبي لأنو الثورة الحقيقيه لسه ما بلشت .. ثورة العقل والضمير .

اللي ما رح يعجبوا كلامي يحذفني ما بقى فارقه .. أصلاً عم بدعي لربي إنو مارك يسكرلي صفحتي ويخلصني



تنويه : ماينشر على صفحة فيسبوكيات تعبر عن رأي وفكر كاتبه ولاتعبر بالضرورة عن رأي الموقع