أخبار عاجلة
الرئيسية » كتاباتكم » منال بيطار : التسعة إلنا والواحد إلك يا شاطرة ….

منال بيطار : التسعة إلنا والواحد إلك يا شاطرة ….

التسعة إلنا والواحد إلك يا شاطرة ….

بعد التخرُّج طلعت وظيفتي بالمرفأ … طبعاً ما ضل حدا ما حسدني عليها باعتبار المرفأ معروف باسم (جورة الكفر) وما حدا بيتوظف فيه غير بيطلع غني
المهم أول ما توظفت وطبعا ما فهمانة شي لا شو وظيفتي ولا شو شغلي … قاعدين من الصبح لآخر الدوام على قهوة وشاي …
بعد حوالي شهر بيجيني تكليف برئاسة لجنة الصيانة لأحد مباني المرفأ
طبعاً أنا فرحت وافتكرت حالي شغلة … رئيسة لجنة خبط لزق والله حلوة …
المهم صرت اسأل شو لازم اعمل … الكل كان عندو نفس الجواب بكرا بتعرفي لحالك ..!!!!
طبعاً أنا أخدت الموضوع جدي ورحت عالمبنى وشفتو مهرهر …ما عرفت لشو عملوا الصيانة
؟؟؟

 

https://play.google.com/store/apps/details?id=com.syria.jmyz_ufqecwxydcjftw

 
تاني يوم من الصبح بالمكتب (( ما تفتكروا مكتف وجخ ومكيفات وسجاد و خشب و فخامة
كلو على بعضو تنكتين لازقينون ببعض ))) دخل لعندي رجال وسألني :
إنت المهندسة منال ؟؟ قلتلوا ايه اتفضل خير ؟؟
قلي ما وقعتيلنا عالورقة إنو المبنى مجدد بالضبط متل مواصفات العقد
قلتلوا لا والله ما وقعتوا لسا
قام مد أيدوا على جيبتو وشال رزمة مصاري وبلش يعد … واحد اتنين تلاتة لحتى صاروا عشرة
وشلفلي ياهم وقلي وقعيلنا لو سمحت بدنا نخلص …
طبعاً أنا متل المسطولة ما عرفانة شو صاير
عبست بوجهو وقلتلوا شيلهم أحسن ما اعملك كارثة … وبطلت وقع ..( عأساس أنا شغلة ورئيسة لجنة وإلي كلمة وشو بعرفني )
قلي هيك لكن … اية بسيطة وطلع …
بعد عشر دقائق بيعيطلي المدير …
وقلي شو يا باش مهندس ؟؟؟ بلشنا مشاكل؟؟؟
وأنا بكل ثقة قلتلوا شايف يا أستاذ هيك هيك عمل هادا
قام قلي لا تكوني مفتكرة اعطيتك هالمهمة لسواد عيونك … التسعة إلنا والواحد إلك يا شاطرة وتووووووووووت
وطبعا تمَّ توكيل المهمة لغيري …

بعد حوالي شهرين كنا قاعدين قبل نهاية الدوام وفجأة منسمع انفجار مرعب هز البلد
افتكرنا غارة إسرائيلية … طلع في مبنى ( صومعة حبوب ) ضخم جداً انفجر بقلب المرفأ
ومات فيه عدد من الموظفين و أصيب عدد بعاهات دائمة …
طبعاً ما حدا عرف شو سبب الإنفجار و صاروا يقولوا ماس كهربائي … بس يا ترى ليش هالماس صار ؟؟؟؟؟ أكيد كانت الصيانة كتير كويسة وتماما متل بنود عقد المناقصة …… ولا حدا تحاسب واتلفلفت القصة وما حدا أصلاً استرجا يسأل
وتم تعويض أهالي القتلى بخمسين ألف لأنو ما كان في موضة العنزات لسا

https://play.google.com/store/apps/details?id=com.syria.jmyz_ufqecwxydcjftw
بس شوووو البلد كانت بخير ومافي أحسن من هيك ……. بس نحنا الغشم …..
طبعا أنا كتبت هالقصة ورح اكتب كام قصة صارت معي بشكل شخصي
ما للتسلية وانما لحتى ذكِّر اللي عم يقول البلد كانت بخير وقول إنو نحنا أصلا ما كان عنا بلد …نحنا كنا في مزرعة لتدمير النفوس وسحق العقول وترويض الشعب على الذل والخنوع والخوف والحاجة… واللي بحب الخنوع والذل رح يقول البلد كانت بخير …..
وعمار يا بلد…
محبتي للجميع



تنويه : ماينشر على صفحة كتاباتكم تعبر عن رأي وفكر كاتبه ولاتعبر بالضرورة عن رأي الموقع