أخبار عاجلة
الرئيسية » فيسبوكيات » الدكتور طلال شعار : ولسه عم يغربل الغربال ……

الدكتور طلال شعار : ولسه عم يغربل الغربال ……

كتب الصديق الدكتور طلال شعار Talal Shaarعلى صفحته :
وغربل يا غربال …
غربل كل واحد رفع سقفه بالمعارضة ولما حميت العصاية ، حمل حاله وهاجر …99
غربل كل واحد رفع سقفه بالتأييد ولما خاف على حاله ، كمان حمل حاله وهاجر ..
وجماعة الله يطفيها بنوره ونحنا مابدنا نوقف مع حدا حتى مع الحق ما بدنا نوقف ، لأنه البلد أهم من الأشخاص ، كمان هاجروا ..
والقومجي الكردي ، بدل ما يساهم بتحقيق حلمه القومي على الأرض ، كمان هاجر وطق جنسية مرتبة وأولاده صاروا يدرسوا باللغة الأجنبية وما عاد مهم يدرسوا بالكردية ..
والقومجي العروبي ، كفر بمعتقداته وصار أوربي متعولم وما عاد عنده مشكلة ..
والإسلامي المتدين المعتدل – على أساس – كمان هاجر من بلاد الشام اللي بتمثل الإسلام واعتبر إنه الإسلام هنيك بأوربا ..
والمسيحي الشرقي اللي بيفتخر بإنه المسيحية ولدت هون والمسيح – انصلب هون – كمان هاجر و تركها للي بدهم يهجروه ..
والشيوعي الاشتراكي ، رضي يعيش عند الرأسماليين و أولاد العم سام وهاجر ..
غربل يلي عم يناضل مشان سوريا العلمانية ، قام تركها للتكفيريين وراح عند عرابينه وكأني قضيته هنيك مو هون …
وغربل الدكاترة اللي تركوا مرضاهم وفقسوا .. والتاجر والصناعي اللي قل ربحه قام شمع الخيط مع مصاريه وفقس ..
والحرفي والعامل والمزارع ، يلي تركوا مكانهم الطبيعي وهاجروا ..
والأستاذ اللي ترك طلابه للجهل وهاجر ..
واللي على أساس عم يشتغل أعمال إنسانية ومعتبر حاله بطل وصاحب قضية ، وبيقبض كل شهر راتب بالدولار عمره ما كان يحلم فيه ولولا هالراتب كان ما اشتغل هالشغلة ..
ولسه عم تقولواالبلد خربت !!!
ايه مظبوط ، لأنه البلد بتخرب عن جد لما أهلها بيضيق خلقهم وكل واحد بيصير شعاره الوطني سلامتك يا راس ومستقبلي الخاص ومستقبل أولادي أهم من الوطن ومن القضية ، وبس خلصت منرجع .. بس ما عرفنا مين بده يخلصها وشلون البلد بدها تبقى وتستمر بهالظروف بدون الكفاءات وأصحاب المهن ورؤوس الأموال وأصحاب العقل والثقافة والدين والضمير !!
واللي لسه بقيان يمكن رح يهاجر شي يوم ، بس مو بسبب الظروف .. بسبب إنه أهله ورفاقه تركوه لحاله يحس إنه غريب ووحيد في بلده ..
ولك والله مو المطلوب إنكم تناضلوا سياسيا ، المطلوب إنه كل واحد يصبر ويضل عم يشتغل شغلته بضمير وإخلاص وبس ..
والله هو المتكفل يحفظ الحق والدين والبلد ..
ولسه عم يغربل الغربال ……



تنويه : ماينشر على صفحة فيسبوكيات تعبر عن رأي وفكر كاتبه ولاتعبر بالضرورة عن رأي الموقع