أخبار عاجلة
الرئيسية » قصص قصيرة » معاناة شعب .. قصة واقعية دارت أحداثها في أكتوبر 2016 في بلدة جسرين

معاناة شعب .. قصة واقعية دارت أحداثها في أكتوبر 2016 في بلدة جسرين

 

أنا ياسين عمري 11 سنة انا اليوم أنتهت قصة حياتي وانا جائع سأروي لكم كم كنت أعاني فقد سٌلبت حياتي مني بعد حياة مليئة بالعذاب

ترعرعت على الهموم والعمل من أجل طعامي سأروي لكم ما حدث قبل 3 أيام من موتي 🙁 
……
ياسين : بابا شلونك

بابا : اهلين حبيبي

ياسين : بابا جبلي كاتو نطف قلبي كل يوم بكرا بكرا

بابا : يا ياسين يا حبيبي كم مرة قلتلك وضعنا ما بيسمحلنا أنو نشتري حلويات وكاتو

ياسين : طيب بابا بعتذر بس والله مو بأيدي جوعان ومشتهي الكاتو

بابا : ولا يهمك حبيبي يلا روح نام مشان تفيق عالمدرسة وترجع بكير لنروح عالارض نشتغل

ياسين : يلا رايح خبر ماما تفيقني بكير

بابا : ماشي حبيبي الله يقدرني وجبلك كلشي بتتمناه

ماما : ياسين قوم فيق حبيبي يلا صارت الساعة ستة ونصف قوام حبيبي رفيقك يوسف عم يستناك قدام الباب

ياسين : يلا ماما ثواني وبكون فقت

ماما : يلا حبيبي لبين ما عبيلك مي لتغسل وجهك

ياسين ؛ يلا

الجزء الثاني معاناة شعب

يوسف : اهلين حب شو شمستك عالية طولت شبهن عيونك حمر

ياسين: كنت عم ابكي

يوسف :له ليش لك حب

ياسين: والله دايق خلقي تعبنا وماشفنا بحياتنا شي وعينا على قصف ومبارح سمعت بسقوط قذيفة على روضة بكفربطنا

يوسف :اي

ياسين: لك والله بلاء قصف وجوع مو عيشة اطفال هي

يوسف: لك روضة أطفال شو ذنبهن وفي ضحايا

ياسين: لا والله مافي بس في اصابات

يوسف: الحمد لله . شد رجلك لنستعجل ونروح عالمدرسة

يوسف :شوف شوف لك ياسين هي أبن رئيس المجلس

ياسين :اي هاد الولاد بيعشقوه معو مصاري وشبعان

يوسف :معقول لك أخي كل هالقد المصاري بتعمل

ياسين: اي شيء اكيد

يوسف :الشكوى الك يا الله

ياسين: شوف مين معو عبد الكريم

اي هلق بيجي ومنفهم شو عم يخبر الولاد

يوسف :اي قولتك

ياسين :عبد الكريم تعا لنشوفك

عبد الكريم: اهلين بأصدقائي

يوسف :شبو صاحبك ابن العز

عبد الكريم: والله عم يقول رح تفوت مساعدات اليوم المسا لعنا هيك ابوه خبرو

يوسف: ايوه ياااااا سلاااام

ياسين :عم تحكي عن جد

عبد الكريم :اي والله جد

ياسين :وشو فيها المعونة

عبد الكريم: مثل السنة الماضية
سكر . عدس . طحين . برغل . رز . زيت . شاي وكم غرض بتعرف انت

يوسف: والله مناح الحمد لله

ياسين: اي الحمد لله واخيرا رح اكل كاتو بقى

عبد الكريم :انت حلمك كاتو. انا حلمي فواكه موز تفاح برتقال

يوسف ؛هلق تاكل انت كاتو اكل انا نابلسية بعدين منفكر بالفواكه

عبد الكريم: الحمد لله نحنا عنا قمح ومو جاي عبالي كاتو والنابلسية بس جاي عبالي الحمضيات على هالشتوية

ياسين :حكياتك يا اخي اكبر من عمرك

يوسف :لك والله اعمارنا صغيرة ومخنا اكبر من هيك بكتير

ياسين: الثورة كبرتنا 5 سنين

عبد الكريم : يلا رن الجرص الاستاذ غسان هلق بيجي

ياسين يلا يوسف روح لنفوت عالصف

الجزء الثالث معاناة شعب

غسان : شو يا ولاد السلام عليكم

الطلاب : اهلين استاذ غسان

غسان : شو ياحلوين في نقص بالعدد ليش

يوسف : استاذ نزلت قذيفة بروضة بكفربطنا اغلب الاهل ما بعتو ولادهم

ياسين: شلونك استاذ ابي بسلم عليك

غسان: الله يسلمك ويسلمو

ياسين :استاذ عنجد في معونة اليوم المساء رح تفوت من الامم المتحدة

غسان :هيك خبرونا انو اليوم فايتة قوافل مساعدة

عبد الكريم: استاذ هلق بياع قمر للدين ما عاد يشتغل قدام للمدرسة

غسان: له يا عبد عيب هالحكي الرزاق موجود

عبد الكريم: والله يا استاذ عم امزح الله يرزقو

غسان :برافو عليك حبيبي يلا لنبتدي بالدرس اليوم وما رح نطول مشان نخلص عبكير ونطلع نشوف السيارات وهنن جايين

يوسف: يا سلاااام

ياسين: استاذ بدي اتصور على التلفزيون

غسان :وهو مبتسم قال الله يحميكم لاهلكم ويبعتلكم ايام احلا من هيك

الجزء الرابع

ياسين: رن الجرص يلاااااااا لنروح وين نلتقى

يوسف: عالساعة 6 عند الجامع

ياسين :وانت عبد الكريم

عبد الكريم: عالساعة 6 كمان منطلع عالشارع مننتظرهن

ياسين :انا رايح خبر امي

عبد الكريم: الله يسرلك

ياسين :يلا بدكم شي سلااام

يوسف: تعا نشوف بياع قمر الدين عبد الكريم

عبد الكريم :يلا

يوسف :مرحبا عمو

البياع :اهلين حبيبات قلبي

يوسف :جايينا معونة اليوم

البياع: اي والله هيك سمعت الحمد لله  والحلوان قمر الدين لاحلا طفلين بجسرين

عبد الكريم :شكرا

يوسف :الله يرزقك

البياع: انتو الغالين على قلبي الله يحميكن

يوسف: بدك شي

البياع: الله وياكم

عبد الكريم: تعا نشوف الاستاذ غسان
استااااذ يا استاااذ

غسان: اهلين شو لسا ما رحتو عالبيت

يوسف: كنا عم نشوف البياع

عبد الكريم :وين رايح استاذ

غسان: رايح اشتري قمح واخبز   وروح جيب صهريج مي عبي مي واتغسل وروح عالمجلس كمل الدوام

 

 

يوسف: استاذ ليش بتشتغل بالمجلس كمان

غسان :انتو لساكم صغار بس ما بيتخبا شي عندكم  التدريس ما بكفي مصروف لازم اشتغل شغل تاني لحتى أمن على ولادي وامهن

عبد الكريم: الله يكون بعونك استاذ

غسان : اكل العيش مر يا ولاد
يلا بدكم شي سلام يا ولاد بكرا بتحكولي شو صار معكم بللسيارات تبع المساعدة

يوسف: تكرم استاذ

عبد الكريم: بدك شي اخي

يوسف :الله معك

معاناة شعب الجزء الخامس

ياسين: شلونك ماما

ماما: اهلين حبيبي

ياسين: سمعتي بالمعونة

ماما :اي حبيبي جارتنا هلق خبرتني

ياسين: يا سلاااام

ماما :والله لاعملك قالب كاتو تصل تاكل لتشبع

ياسين :اي ماما بابا وين

ماما :هلق بيجي بابا وبجيب معو ذرة لنتغدى

ياسين :اوف

ماما: لا يا ياسين عيب عالكلمة

ياسين: رح تجينا معونات وما خلصنا من الذرة

ماما: لك حبيبي عيب هالحكي ابوك عم يشتغل ليل نهار المصروف غالي لك امي

ياسين :بس تتوزع المعونة كل يوم غداء شكل

ماما : تكرم عيونك يا روح الماما

ياسين : اوف اي ساعة رح يجي ابي والله جوعان

ماما : يلا ساعة بكون هون

ياسين : لانو بدنا نروح انا ويوسف وعبد عالشارع نشوف السيارات وهنن جايين

ماما : اي بس لا تطلع عالكاميرا عيب حبيبي

ياسين: امرك

ماما : دخيل قلبك يا اجمل شي بحياتي انا كرمالك عايشة

ياسين :دخيل الغزل

ماما : يخرشيت قلبك صاير لسانك حلو الله يحرمني هالابتسامة

ياسين : عم يدق الباب اجا بابا

بابا: اهلين حبيب قلبي

ياسين: اهلين يا عمري

ماما: الله يعطيك العافية حبيبي

بابا :ربي يخليلي ياكن انا لشو بتعب غير كرمالك انت وامك واختك هالصغنونة

ياسين: شو رح تغدينا عندي مشوار

بابا :لوين ما بدك تاكل وتروح تساعدني بالارض

ياسين :مو اليوم بابا مشان الله

بابا :ليش لوين يا مهون شو عندك

ياسين: بابا اليوم طالع انا ويوسف نشوف المعونات وقت ينزلوها ونشوف الأمم المتحدة وسياراتهن

بابا: ههههههه””” روح ربي يسرلك دربك ويحميك دير بالك من التصوير لا تطلع عالكميرا ماشي حبيبي

ياسين: احلا ابو ياسين يخليلي يااااك

بابا :ههههههه مهضوم ربي يرعاك

ياسين: يلا ماما بدك شي صارت ستة الا نكشة بدي شوف رفقاتي قبل ما اتأخر عليهن

ماما: روح ابني الله يسلمك يحميك

معاناة شعب الجزء السادس

يوسف :عبد الكريم يلا اجا ياسين

ياسين: شلونكم مبكرين لسا ما صارت الساعة 6

عبد الكريم: بدنا نلحق نشوفهن قبل العجقة

يوسف :معكن حق هلق الجيش الحر بيبلش غلاظة

ياسين: اي والله هلق بقول الولاد تصف على جنب

عبد الكريم :تقول رح نسرق المعونات

يوسف: يلا يوم وبمر شو متشوق تتوزع المعونات بكرا او بعد بكرا ونفرحلنا يومين

ياسين: لك انا متشوق اكتر منك

عبد الكريم: حاسس حالي بفيلم هندي

يوسف: من وين هالكلمة جبتها شو هي افلام هندية ما فهمت

عبد الكريم: ابي كل مرة بقلي انو احداث البلد مثل فيلم هندي شو يعرفني شو قصدو

ياسين :ههههههه

يوسف: ههههه

يلا تعالو لنروح تأخرنا

يا سلاااام شوف العجقة

يا لطيف شو في عالم

ياسين: كل العالم جوعانة

يوسف: اي والله ليك العالم بانتظارهن بفارغ الصبر

ياسين: ايمت بيصلو

عبد الكريم: يلا عد لل100 بتلاقيهن وصلو

ليكهن اجو

يوسف: وليييي شوف العالم

ياسين :ليك سياراتهن ما احلاها

عبد الكريم: تعالو لنقرب بركي منشوف هاد المسؤول

ياسين: مستحيل يخلوك تشوفو

عبد الكريم: شي أكيد

يوسف: نحنا فقراء صعب نشوف هيك اشخاص

ياسين: ليك كم سيارة معونة 10 سيارات هدول

يوسف: بكفو كل الشعب يلي هون

ياسين :مو أكيد بكرا بيسرق المجلس نصهن

عبد الكريم: شو نسيت لك اخي حصة الجيش الحر

يوسف :يا حبيبي والله لنروق

ياسين: لك اخواتي الحمد لله شي احسن من شي

عبد الكريم: هي السلطة مو بايدنا

يوسف: تعالو نقرب شوي نشوفهن

ياسين: ليك المبعوث كانو مرا

يوسف: اي والله

عبد الكريم :لك ليك شو شايفة حاله

يوسف : لك والله خليها تنزل المعونات وتضرب هي وشوفة حالها

عبد الكريم: الحمد لله

يوسف: والله يا عبد ان كبرت بدي اشتغل بالامم واتفرج عالعالم كلو

عبد الكريم: احلا شغل هاد

يوسف :شبو ياسين بشو شارد
ياسين .. ياسين

ياسين: شبك عم تصرخ

عبد الكريم: شبك

ياسين: مافي شي بس للحظة حسيت انو الحياة عادية

عبد الكريم شو قصدك

ياسين: شغلة ما بعرف كيف

عبد الكريم: ما عم افهم عليك

ياسين: مافي شي بس شفت صورة قدامي عم تقلي لا تحلم

عبد الكريم: شو عم تهلوس بالكاتو انت

ياسين: معقول والله يمكن

يوسف :ياسين الأجدب

ياسين: خراس هههههه

عبد الكريم: يلا تعالو نروح بلا ما تصير شي قصة ويغلا قلب اهلنا علينا

ياسين :معك حق

يوسف: اي والله امي قالتلي رجاع خبرني شو بصير معك ولا تتاخر

عبد الكريم: يلا تعالو لنطلع من هون

يوسف: ليك المدرسة بلليل ما احلاها

ياسين: ههههه شو ذكرك فيها

عبد الكريم: يا اخي المدرسة قصة حب لا تنتهي

ياسين: ههههه عبد الكريم عم يتعلم الحكي بسرعة صاير كبير وما منعرف

وينك قولتك بكرا بعد المدرسة بوزعو الاكلعبد الكريم: لا ما بظن بدهن يحصرو العدد ويوزعوهن بالتساوي بعد السرقة

ياسين: الله ياخدهن ولا يسامحهن بكل دمعة سقطت من طفل جوعان

يوسف: امين

يلا بدكن شي بالأذن وصلت عالبيت طالع انا

ياسين: يلا وانا كمان رح روح من هون بدكن شي اقرب للبيت

بكرا منحكي مع الاستاذ غسان ومنشوف ومنعرف ايمت رح يوزعوهن

يلا باااي

معاناة شعب الجزء السابع

ياسين :مرحبا ماما

ماما: اهلين حبيب قلبي

ياسين :يلا فيقيني بكير رايح نام

ماما: لك تعال تعشى ذرة

ياسين :ما بدي

ماما: لك تعال احكيلي شو صار معك

ياسين :بكرا بكرا

ماما: يقبر قلبي فرحان بالمعونات وعم يفكر بالكاتو

ياسين :ماما ماما

ماما :حبيبي شبك ليش فايق بكير وليش وجهك اصفر

ياسين:
كا بعرف شفت منام مو حلو

ماما :خير يارب والله قلبي حاسس بشي

ياسين: ما بعرف ماما

ماما :لا تخاف حبيبي
ابو ياسين فيق

بابا: شبكن فايقين من على بكرا

ماما: شوف ياسين مخطوف لونو

ياسين: ما بعرف بابا بس شفت منام وارتعبت

بابا :لا تخاف هاد من كتر ما عم تفكر

ماما :شبك حبيبي عم يرجف

بابا: اي لا تبعتيه عالمدرسة

ماما: اي بكون احسن

ياسين: شو لا مافيني شي كلو منام

بابا: ما قلتلك من التفكير

ماما: واللخ قلبي عم بقول انو في شي

ياسين: الا ماما يمكن حلمت بهي المبعوثة تبع الامم المتحدة

ماما :شبها

ياسين :بترعب

ماما: ههههه يلا الله يمضي النهار على خير

بابا :يلا فقست النومة

ماما لا يا رجال رجاع نام

ياسين :رايح جيب سطلي مي واتغسل والبس  وجهز حالي وروح عند يوسف بكون فاق

ماما: يلا حبيبي قايمة انا جبلك مي

ياسين  : لا ارتاحي

ماما: لا حبيبي انا بحب اتصبح بوجهك وهو منور يا روح الماما

بابا: بلشنا سيمفونيتك ام ياسين

ماما :ابو ياسين بتعرف انو ياسين أغلا واحب على قلبي من اختو

بابا :عيب يا مرأة كلهن ولادك

ماما: ما بعرف ليش بميل الو اكتر منها

بابا: يلا روحي عبيلو مي

ماما: ياسين ياسين وينك

ماما: ياسين يا ياسين وين رحت شو رجعت نمت

ياسين اي غفلت عيوني

ماما: اي يلا قلبي قوم غسل وروح عند يوسف

ياسين: اي يلا

ماما :ابو ياسين ما بعرف ليش خايفة على ياسين

بابا :كل مرة بتطلعي بهالقصة انت

ماما: لا هالمرة غير

بابا :لك شبك بكون عم يهلوس بالكاتو

ماما: الله يحميه

ياسين :بدكن شي

ماما: تعال هات بوسة

ياسين: يلا

ماما :مووووووووه

الجزء الثامن مواساة شعب

ياسين مرحبا خالة وينو يوسف

ام يوسف يلا عم يلبس
يوسف..يووسف

يوسف اي ماما

ام يوسف تعا حبيبي ياسين عالباب

يوسف اي جاية

ام يوسف هات بوسة حبيبي قبل ما تروح
موووووه

ياسين اهلين يا غالي

يوسف اهلين فيك اخي فايق بكير شايفك

ياسين اي والله فقت شفت منام مو حل

يوسف  : خير ان شاء الله

ياسين  : تعا نروح يلا

يوسف يلا

ياسين شو مشان المعونات ايمت رح يوزعوها

يوسف يمكن المسا او بكرا الظهر

ياسين خير ان شاء الله
يلا خف رجلك لنروح دايق خلقي

يوسف والله وانا كمان يا قلبي

ياسين شوف هي صاحبك ابن رئيس المجلس

يوسف اي

ياسين لك شوف شلون مظاهرة وراه مشان يعرفوا ايمت رح تتوزع المعونات

يوسف والله يا قلبي ابن مسؤول صار هاد

ياسين الله يلعن هالازمة

يوسف اي والله

ياسين تعا نفوت عالصف دغري لان مخنوق

يوسف شبك شو صاير معك

ياسين مو صاير شي قلتلك مخنوق وشايف منام مو حلو

يوسف يلا كلو لخير

غسان مرحبا يا حلوين

الطلاب اهلين استااذ

يوسف اهلين استاذ غسان

عبد الكريم اهلين استاذ غسان

غسان شلون نهاركم اليوم

يوسف كل الحديث عن المعونات

غسان ياسين شبك

يوسف عم يفكر بالكاتو وبالأكل

ياسين مافي شي استاذ

غسان الله يحميكن ويخليكن
يلا لنبلش بالدرس اليوم عن التاريخ الاسلامي

مضي من حصة ما يقارب الساعتين
وفجأة صاروخ بيضرب الشارع العام بجسرين
الطلاب خافت انتهت المدرسة رن الجرص للانصراف والتوخي والحذر

هدي القصف نصف ساعة

طلعت مع الاستاذ غسان وعبد الكريم ويوسف وركدت باتجاه باب المدرسة وكان في طلاب عم تركد واغلبهن طلع قبلنا
وللحظة طلع صاروخ بعيد وبعدها حسيت بسكرات الموت

شفت ارواح عم تتطلع معي

هاد الاستاذ غسان وهاد رفيقي عبد الكريم
وهاد هاد اخي وصاحبي يوسف

شو صار معقول كل الحلم بالكاتو تتلاشى
معقول متت جوعان
معقول كان الدرس عن الوطن العربي
معقول العرب ما يصدقو قصتي

النهاية

ملاحظة هذه القصة حقيقية وواقعية
وما حدث فيه
حدث فب اغلب سوريا
لكم مني اجمل تحية
ابطال القصة
الشهيد الطفل ياسين غالب هاشم
الشهيد الطفل يوسف الديابي
الشهيد الطفل عبد الكريم محمد خير درويش
الشهيد الشاب غسان عبد الواحد كتب
الجرحى
بائع قمر الدين
بائع الذرة
ابن رئيس مجلس البلدة
الحمد لله على كل حال
احسن الله خاتمتنا

بقلم عبد الرحمن أبو حسن