أخبار عاجلة
الرئيسية » فيسبوكيات » وائل العبد الله : يلعن روح أبوكن واحد واحد ولاد زنوة.

وائل العبد الله : يلعن روح أبوكن واحد واحد ولاد زنوة.

درعا حالها كحال باقي المدن السورية يلي بقيان فيها صراع مسلح، الروس والأ.مريكان ماشيين حسب تفاهمات الإسرائيليين والأردن والخليج، كان العائق الأول هو الفيتو الإسرائيلي يلي كان مرتبط بطرد وجود الميليشيات والقوات الإيرانية بالمنطقة الجنوبية.
.
من وقت تدخل الطيران الروسي بتوضح الصورة إنو التفاهم تم والأمور ماشية باتجاه اكتساح المنطقة وتسليمها لقيادة النظام والشرطة العسكرية الروسية دون أي تواجد للإيراني ( على الأقل ظاهريا وأظن بشكل مطلق).

المحزن بالأمر هو الضحايا المدنيين يلي رح يدفعوا ضريبة التفاهمات هي، والخيبة الجديدة إلنا نحن جمهور الثورة وما تبقى منها، نزوح، لجوء، ضحايا، إغاثة، مخيمات، صورة صادمة للضحايا حتقضي على بقايا العقل فينا.
.
بس ونحن عم نحكي بدرعا عيوننا على إدلب، أكيد السيناريو الدولي ما رح يقبل بوجود مناطق مارقة خارجة عن الدولة، ما حدا بدو تقسيم، حتى مفهوم مناطق النفوذ صار غائم ومائع، وكارثة إدلب حتكون أعظم كارثة إنسانية كونها تحتوي كل الكوارث الإنسانية السابقة.
.
فينا نعمل شي؟ لاء، فينا نقدم شي؟ على مستوى كارثة لمدينة أكيد لاء، طيب شو نعمل؟ ولا شي حنتابع حياتنا وناكل نصيبنا من الألم والخيبة والفجيعة، جلد ذات وتحمّل فشل جديد وذنب جديد نحن ما إلنا يد فيه من البداية.
.
الناس رح تتابع المونديال، ورح تكمل حياتها، شوي شوي من يوم قصة القصير ونحن عم تتبلد مشاعرنا، طبعاً مو قلة ناموس أبداً، بس العجز قاتل، والقلة هلكت العباد، حتى أبسط الأفعال صارت معجزة بهالزمن السيء علينا وين ما كنا.
.
حقدنا على الائتلاف والإسلاميين وأصدقاء سوريا وعلى الأخوان بقدر حقدنا وكرهنا للنظام، يلعن روح أبوكن واحد واحد ولاد زنوة.

رح تبقى درعا وهتفافاتها الجزء الاجمل بنوستالجيا الثورة ورح تبقى مظاهرات درعا الأجمل، ورح تبقى يا حيف مرتبطة بدرعا.

ومعليش درعا معليش.. لا تسيل من عيونك دمعة
معليش درعا معليش.. لا يهمك بشّار وربعه
خلّه يسجن، خلّه يعذب، خلّه يقتل، خلّه يضرب
خلّه يحاصرنا بالجيش..
بولادك بتضلّي قلعة
وائل العبد الله



تنويه : ماينشر على صفحة فيسبوكيات تعبر عن رأي وفكر كاتبه ولاتعبر بالضرورة عن رأي الموقع