أخبار عاجلة
الرئيسية » الشأن السوري » ما حدث بالتفصيل في قرية شبكي بريف السويداء يرويها أحد المشاركين الذي قاتلو داعش وفزعوا لاهلها

ما حدث بالتفصيل في قرية شبكي بريف السويداء يرويها أحد المشاركين الذي قاتلو داعش وفزعوا لاهلها

اليوم الساعة 7 الصبح
منوصل مع مجموعة شباب عقرية (شبكي)
اول ما وصلنا ع اول البلد
بيطلع قدامنا سيارة جيب فيها تلاث شباب مقتولين بقلب السيارة والسيارة مخردقا
منمشي عشرين متر لقدام منلاقي سيارة مخردقا كمان وفي شبين متل الورد مزتوتين عجنب الطريق ومافي محل بجسمن مو ماكل رصاص
منكمل لنفوت عقلب البلد وبيبلش زخ الرصاص علينا
من وين ما حدا بيعرف
مناخد مواقع ومنبلش نمشط شوي شوي
وعند كل بيت منوصلو منشوف منظر بيبكي الحجر
في بيت منهن فيو زلمة ومرتو وبناتو تنتين
الزلمة كان مقتول عباب البيت وبس فتنا فتشنا البيت لاقينا عيالو متخبين جوا وبس فتحنا الباب عليهن
صار يصيحو لبين وهني مو عارفين انو الو ساعتين مقتول عباب البيت 💔
منكمل لنلاقي شب مخطوف لونو ومنسألو شو الي صار
بيقلنا وهوي عم يرجف (انا شفتن فاتو عبيوت مافيها غير نسوان وصارو يضربوهن ويحملوهن بالسيارات)

وفي بيت لاقينا في واحد حاطط اخوتو تنين عفراش ومغطيهن وعم يبكي ويقول ذبحولي اخوتي
وعم يصيح وينخي هالبشر💔

كملنا تمشيط و جثث الزلم والختايرة الي عم يدافعو عن عرضن عجناب الطرقات
منوصل لمنطقة ومنتمركز فيها وفي قبالنا مستوصف كانو محتجزين في نسوان وولاد وبيصير في اشتباك
وبقدرة الله والخمس الحدود ونخوة شبابنا ومرجلتن بينسحبو منو ومنفوت عليه لنلاقي نسوان عم تبكي وتزلغط بنفس الوقت
ماحدا بيقدر يوصف وجوهن والخوف الي فيه
شي بيفزز شعر البدن
بيتمركزو الخنازير بمجلس البلد وطبعا الشباب كلها حطت روحها عكفها وحوطنا المجلس وبلشنا زخ رصاص عليه وزتينا قنابل بقلبو
وتفقنا نفوت عليه
بس ولاد الحرام كانو لساتن عايشين وقتلو 8 شباب من عنا واحد ورا التاني
وكان كل ما ينقتل او يتصاوب واحد
شباب بني معروف تثور اكثر واكثر ومنن الي خيو وقع قدامو وضل عم يقاتل وما ترك وفل
ومنن الي تصاوب وضل واقف على اجريه
ومنن الي سحب موس وهجم عالمجلس من فورة دمو
وبدو ياخد بثار الي راحو
واستمرت هالشغلة شي نص ساعة
لحتى انسحبو من المجلس ومن البلد كمان
#الخلاصة
انا كنت من الناس الموجودة هنيك وهاد الشي شفتو بعيوني
وبعمرو هاليوم بتفاصيلو كلها ما رح يروح من بالي
الشوف مو متل الحكي
اهل هالبلد تشردو بكل معنى الكلمة.