أخبار عاجلة
الرئيسية » فرفش » قرب جرب يا بلاش على شحاطيط سوريا الأسد : الشحاطة النسوانية بوصلة الاقتصاد السوري

قرب جرب يا بلاش على شحاطيط سوريا الأسد : الشحاطة النسوانية بوصلة الاقتصاد السوري

الشحاطة النسوانية بوصلة الاقتصاد؟؟؟ قللي بياع الشحاطات بأنه لايمر يوما لايبيع فيه عدد كبير من الشحاطات، بينما قد لايبيع ولا كندرة لمدة أسبوع..

.
وانا مارقة كان يناديلي ويقلي عم رتب سيري الشحاحيط الجديد حسب النمرة..عشر دقايق روحي ورجعي قبل ماتطير نمرة رجلك…

.
كل عيد بتشتري الأم لأولادها حاجاتهم الضرورية ولايتبقى لها سوى ثمن شحاطة .العيد بالنسبة الي كان الشحاحيط الجديدة برجلين النسوان ومرات بيكونوا نفس الموديل..

.

-هدية عيد الأم من ولادها يللي يادوب جمعوا حقها غالبا شحاطة،

 

.

-اي ست بدها تولد او تعمل عملية اول شي بتشتريه شحاطة جديدة..

.

اليوم بسوق مساكن برزة عجقة شحاحيط..وخاصة النسواني من ال١٠٠٠ ل٢٥٠٠ وكلو مرتب ومقبول  .. وكلو كان سعرو القديم بين ال٣٠٠٠ والخمس تلاف…يعني النص تماما،وكل ما ست شافت رفيقتها او جارتها بتسألها شو اشتريت؟ بتضحك وبتفتح كيسها وبتقلها شحاطة..وبيضحكوا سوا وبتطلع التانية مشترية نفسها..

.

سألت كم بياع شو قصة هالرخصة الحقيقية وهالعدد الكبير من الشحاطات؟ قلت يمكن كترانة ورشات الشحاحيط أو المواد الأولية رخصانة وردوا بلا قاطعة…
طلع الموضوع كساد وبس..

.

كلشي معروض زايد وصيفي والشتوية عالباب والمحلات مافيها مستودعات للتخزين.. وطلع فعلا الرخص بتجيب شراية..والشحاطة ضرورة..وكلو اهترى ويا ما أحلى التجديد..الاكترية كانوا عم يطلبوا لون خمري أو يللي عليها رسمات وفرو..يعني مزاج فرايحي كمان…

.
كنا كل مانشتري كندرة يمننا البياع ويقلنا أخدتوها ببلاش بكرا بدي جيبها وسعرها دبل…

.
اليوم البياع قلي وانا عم حاسبو :صغيرة كبيرة بتتبدل! ماعجبك لونها بتتبدل..قلتلو شو ها الرضى كلو؟ قللي ولو،  مصرياتك ياخانم..ويللي بيدفع بيطلعلوا يبدل ويغير ويستحلي كمان…

.
يعني قالها أشكرة…قوة الشراء بايدنا..والسوق بايدنا.. وياحسرة ع يلي مالو لا بالبيع ولا بالشراية..

.
عم فكر بالرجلين كم لزقة طبية بدها تغطي فقافيل الشحاطة الجديدة..وأكتر شي عم فكر أنو الكساد الو محاسن..كل السيدات يللي بايدن كياس رح تعيّد رجليهن اليوم…وبيجوز هنن كمان يعملوا من شروة الرخصة عيد ولو عجناح شحاطة.

.
.إن تنفيق الاف الشحاحيط هو تحريك عظيم لدورة رأس المال والاقتصاد..

.
وألف رحمة تنزل عروحك يا ماركس .

 

 

نقلا عن الفيسبوك باللغة العامية المحكية