أخبار عاجلة
الرئيسية » حكايات من سوريا » مشاهدات طالب جامعة واحاديث تنضح بالطائفية البغيضة في سرفيس سوري

مشاهدات طالب جامعة واحاديث تنضح بالطائفية البغيضة في سرفيس سوري

اليوم راجع من الجامعة عالبيت بالميكرو
ففي عسكري قاعد بالمقعد يلي وراي
اجا العسكري عم يحاسب وناولني 100 ليرة وعم ينتظر ليرجعلو الشوفير ال 50 ليرة
الشوفير المشحر ما معو فراطة لأنو لهلق ما انحلت معضلة ال 50 العظيمة
قلو شو يا حبيب آبدك ترجعلنا الباقي
قلو الشوفير ما معي فراطة طول بالك هلق برجعلك
قلو بالله هنتو الشوفيرية كذابين ليكا الدولة متطبعلكين خمسينات جديدديييي (بيني وبينك علي الحلال رغم انو اغلب تنقلاتي بالسرافيس لهلق ما لمحتا لهل 50 فيس تو فيس !!…( وجه لوجه  )
قام هيك الشوفير ورجعلو ال 100 ليرة كلا قصر عي ووجع راس
قام قلو العسكري لا عيني هنا ما عم اشحد مناك وخود هي ال100 وبدك ترجعلي ال 50 بالزور
قلو الشوفير لك اخي والله مسامحك ومو شحادة بعتبرك اخي طلع معي ما باخد منك
قلو لاااا هنا مني اخوك نحن مندافع عنكين ونحمي الوطن بدالكين مو تتعتبرونا اخواتكين نحن اسياد الشعب ولولانا هلق ما كنتو عايشين
وخود بقا على سئالة وغلاظة وتوزيع بطولات وبلش يحكي عن امجادو وبطولاتو بكل فخر وانا كل مالي عم غبا وغبا وغبا بعدين الا شوي رح انفجر بوشو وقلو لك انت واحد مجرم ومقرف وسرسري والدم عم يقطر من انيابك تضرب انت ومعلمينك واسيادك وخراي عليك وعلي فهمك انك شغلة مهمة شقفة عسكري ابو شحاطة نتن
بس غبيتا ( كتمت شعوري  )  ونزلت بنص الطريق بس لأضبط حالي واتوازن من جديد قبل ما يفلت لساني
هيك تفاصيل حياتنا هيك صفيانة البلد لا جديد يذكر

 

 

نقلا عن الفيسبوك



تنويه : ماينشر على صفحة حكايات من سوريا تعبر عن رأي وفكر كاتبه ولاتعبر بالضرورة عن رأي الموقع