أخبار عاجلة
الرئيسية » مدونات Blogs » سيدة سورية تتنصت على عذابات وآلام وآهات السوريين وتدونها

سيدة سورية تتنصت على عذابات وآلام وآهات السوريين وتدونها

كل تكسي بيشتغل عليها ٣ سائقين صاروا بس واحد..يعني المالك الأصلي..يعني بيتين وعيلتين ضلوا بلا خبز..
كل سوزوكي بتنقل خضرا وشوفيرها عجز عن تأمين البنزين في ٣ بيوت انحرموا من الخبز صاحب السوزوكي وبياع الخضرة المفرق وحتى صاحب المحل بسوق الهال او الفلاح..حتى بضاعة مافي..
كل سيارة دوبلت أجرتها نقص الطلب عليها تلتين الحركة الطبيعية..يعني خسارة رغم الغلا…
الناس قاعدة بالبيت والدنيا برد..والولاد بس يقعدوا بالبيت بدن دفا وبيزيد أكلن..هيك أم قالتلي ، صايرة الناس تخاف من لقمة ولادها..
البنزين مو رفاهية..عصب رئيسي للحياة..شغل ومورد وحركة وبركة..
مبارح شوفير قللي حبة السيتامول مهما وجعك راسك إذا بتنامي ما عاد بتعتازيها بس البنزين ما بتنامي اصلا انت وعم تفكري فيه وبنتائج غيابو…
ارحمونا…بيكفي وحاج زعبرة وتخلي ..بيكفي.. ويللي استحوا ماتوا.

الله يحميلك هالعيون الحلوة! أسألها كيف شفتيهن ونضارتي قد وجهي كلو؟ تضحك وتقول لي ماعاد حدا عم يعطينا شي..وصرنا نغيرالحكي بلكي بينبسطوا النسوان عليه وبيعطونا..كلمات جوعانين وعم نربي أيتام ماعاد حدا رد عليها ولا علينا …
متسولة يصرخ عليها شخص ويقول لها روحي من وجهي، نحنا الشحادين مو أنتو؟
صبي بيقلي عطيني بسكوتة اذا معك ومو ضروري مصاري..
ام وابنتها فوق درج الجسر تقول مشان الله حق دوا لهالطفلة..تقترب منها سيدة وبتقلها خليها تموت أريح الك والها..هي عيشة هي!!!
٣ صبيان عم يتقاتلوا عمية ليرة زتتها سيدة من شباك السرفيس هو وماشي..القتالة دغري بلشت بضرب الروؤس تحديدا..وضرب جحاشي بطريق كتير عنيفة..
الكساد لحق حتى سوق التسول…