أخبار عاجلة
الرئيسية » كتاباتكم » ماهر سليمان العيسى: الخراب …!

ماهر سليمان العيسى: الخراب …!

– سلامات .. طمني عنكم .. شو الجديد حواليكم ؟ كيف تقرأ الوضع ؟.
– اعذرني للتأخر … حولنا لا يوجد الا الخراب … مين قال ماصار شي بالساحل !!! صار كتير يا عزيزي صحيح ما انهدت البيوت وما اتدمرت حارات بس شو ضل ؟ شو ناطرين ؟ ناطرين نصير دويله علويه ؟ لما كانت دوله كان حاكمنا فيها الزعران فا كيف اذا صارت دويله وبعد كل هالقتل والاجرام !!! وين سوريه ؟ بح ما بقى في شي اسمو سوريه ما ضل للواحد منا الا بيتو ومشكلتو اذا عندو اكتر من ولد ذكر يفكر وين بدو يسفرو واذا ما قدر بصير عندو خيارين يا اما شي شغلة من هالميليشيات المعباية الدنيا يا اما الجيش … اذا اخترت الجيش كمان لازم تكون احوالك الماديه ممتازه لأنو راتب ابنك وفوقو قدو لازم تدفعو للضابط المسؤول عن ابنك مشان ما يبعتو عالمناطق الساخنه ويرجعلك بعد كام يوم شهيد ومن منظور تاني فطيسه !!! المسؤولين عن التطوع بالمليشيات ما ضروري يكونوا بالجيش او الن اي علاقه سابقة بهيك مجال يعني ممكن يكون الواحد منن مهندس بيشتغل بالتعهدات او تاجر او صاحب مكتب عقاري او قواد . الحكي عالدوله والضباط والفاسدين على ابو موزة بس بالمقابل لسه بيقولولك ما النا الا بشار وروسيا وايران !!! تركيبه بدها الله …

غلا فطيع وقهر وذل ومع ذلك لساتنا متل الاول ما قادرين نقنع تيس واحد منن انو ما كان انقتل نص ولادن لو فكروا غير هيك .
كل شي قابل للانهيار بلحظه صدقني ما بعرف كيف عم تمشي هالدنيا حوالينا بس المتأكد منو انو ما حدا عم يعمل شي الا بحدود مصلحتو الفردية الخالصه يعني كل حدا منتمي لنفسو وبس . وفينك تتخيل شو مصير هيك مجتمع بظل دويله طائفيه .
باختصار عزيزي كل شي قابل حاليا للبيع وآخر هم العالم هوي الوطن . انحلال اخلاقي مريع ما ضل شي بينقال عنو عيب ما في عيب كل شي مباح حتى السنه صارو بس بدن يمشو امورن يعني كتير بيلاقو حالن شاطرين لما بيزبطو حالن مع شي عنصر بالامن او شي سمسار من سماسرة المليشيات . عندن كتير متطوعين بميليشيا مختلفه وبيقبضو رواتب كويسه . قرف ويأس وانت بتعرف انو ما ضللنا شي نعملو يا عزيزي خلص الموضوع صار بين ايدين الكبار .



تنويه : ماينشر على صفحة كتاباتكم تعبر عن رأي وفكر كاتبه ولاتعبر بالضرورة عن رأي الموقع