أخبار عاجلة
الرئيسية » فيسبوكيات » الفنان مازن الناطور ينشر رسالة مؤلمة أرسلها صديق له من داخل مناطق النظام المجرم في حوران

الفنان مازن الناطور ينشر رسالة مؤلمة أرسلها صديق له من داخل مناطق النظام المجرم في حوران

تعليقا على نشري لصوره الشباب الذين يتم اختطافهم وتقييدهم بالجنازير وزجهم في صفوف مايسمى بجيش الوطن
Mazen Al Natour

وردتني هذه الرساله على الخاص من احد الاصدقاء الذين اثق بهم وأقدرهم من الداخل … فأحببت ان اشارككم اياها :
يسعد مساك..
يا ريت هالصورة هي الصورة الوحيدة يللي بتخلّي الواحد يكره حياتو..
أقل توصيف للحياة عندنا من بعد الكارثة ممكن نقول عنها حياة الموت أو موت الحياة..
عشرات الصور اللي بتشبهها
واحد بدو يسقط ابنو المستشهد بكتبوه إعتراف إنو العصابات الإرهابية قتلتو..
راحت هويتك وأوراقك وأغراضك بالتعفيش والقصف بدك تقول الإرهابيين سرقوا وخرّبوا..
بدك أي ورقة تسجل ابنك بدقولك فيش وإذا عليك شي عالأغلب بيشحطوك وبقولولك التسوية إنقعها وإشرب ميتها وخاصة إذا طلعت خارج درعا ولازم أهلك وقتها يستنجدوا بالروس يللي دمروا البشر والحجر ليتواسطوا ويطالعوك..
وين ما رحت بدك تدفع مخالفات للكهربا للمي طابع إعادة إعمار وكأنك إنت اللي دمرت بيتك ورميت عليه صاروخ أو حاوية وبرميل..
بتبكي لمّا تشوف الأولاد اشلون انمسح وانغسل دماغهم ورجعوا يرددوا حماة الديار ..
مدرسين ومدرّسات كانوا مستفيدين من الثورة صاروا يرقصوا بالمسيرات ويعاقبوا كل مقصر بالطلائع والشبيبة ويرحبوا برجعة الحزب والاشتراكات الحزبية..
حواجز عمداخل ومخارج القرى للتشليح والجمركة ومقاسمة الناس على أرزاقها..
شيوخ على المنابر تمجد عودة الأمن والأمان وتخطب عن الطهارة والنجاسة وأركان الإسلام وكأننا في صفوف الابتدائي..
أقارب وجيران وأصدقاء تتفاجأ بأنهم كانوا مخبرين وفسافيس ولاعقي أحذية..
مرتزقة يهرولون للانضمام لصفوف التشبيح والتعفيش والولاء لمن قصفهم ودمرهم..
قوادين يداً بيد مع الشبيحة ممّن كانوا بالأمس ثوّار..

facebook
بطالة وعوز وفاقة وفقر وإرتفاع أسعار وندرة فرص العمل وإستغلال..
إذلال وتركيع وتجويع وتلويع وتمنّي للموت دون الحصول عليه.



تنويه : ماينشر على صفحة فيسبوكيات تعبر عن رأي وفكر كاتبه ولاتعبر بالضرورة عن رأي الموقع